Torre de Babel

Torre de Babel
narración bíblica (es) , tema artístico (es) , tópico literario (es) y Mitu fundacional
Llocalización
Historia y usu
Orixe del nome	Torre de Babel (es)
Relixón	cristianismu xudaísmu

La Torre de Babel ye una construcción de tipu zigurat que ye mentada na Biblia. Según se narra nel capítulu 11 del Xénesis, los homes pretendíen, cola construcción d'esta torre, algamar el cielu.

Yahvé, pa torgar l'ésitu de la empresa (que s'oponía al su propósitu de que la humanidá s'espardiera per tola superfiecie de la Tierra, xorreciera nella y la soxulgara), fizo que los constructores entamaren a falar estremaes llingües, darréu de lo cualo reinó l'alloriu y dispersáronse.

Tola Tierra tenía una mesma llingua y emplegaba les mesmes pallabres. Los homes na so emigración haza oriente afayaron una llanura na rexón de Senaar y allugáronse ellí. Y dixéronse unos a otros: «Ea, faigamos lladriyos y cozámolos al fueu». Sirviéronse de los lladriyos en llugar de piedres y de betún en llugar d'argamasa. Llueu dixeron: «Ea, edifiquemos una ciudá y una torre cuya cima algame'l cielu. Faigámonos ansí famosos y nun teamos más espardíos so la faz la Tierra».

Mas Yahvé descendió pa ver la ciudá y la torre que los homes taben erguiendo y dixo: «He equí que toos formen un solu pueblu y toos falen una mesma llingua, siendo esti l'entamu de les sos empreses. Un res-yos torgará que lleven a cau tolo que se propongan. Pos bien, descendamos y ellí mesmu tracamundiemos el so llinguax de mou que nun s'entiendan los unos colos otros». Ansí, Yahvé dispersólos d'ellí sobre tola faz la Tierra y apararon na construcción de la ciudá. Por ellu nomósela Babel, porque ellí tracamundió Yahvé la llingua de tolos habitantes de la Tierra y dispersólos per tola superficie. (Xénesis 11:1-9.).

Nemrod, quien foi'l primeru en facese rei depués del Diluviu, y a quien la Biblia identifica como un poderosu cazador opuestu a Yahve, ye siñaláu como'l verdaderu xestor de la idea de llevar a cau esta pergrande empresa. Dellos intentaron identificalu con Sharrukin o Sargón I d'Akkad, el fundador del primer Imperiu semita (acadiu) de que se tien alcordanza. Otros creyen ver nesti vigorosu cazador la figura del dios asiriu Ninurta, dios de la guerra y de la caza que, como Nemrod, placíase en cazar a los sos enemigos.

Al nun disponer de piedra pa la construcción, decidióse fabricar lladriyos. Y comu tampocu cuntaben con cal, usaron betún comu argamasa.

El tiempu aproximáu de la so construcción pue deducise de la siguiente información. Péleg (cuyu nome perpetuóse nel d'una ciudá na confluyencia del Éufrates col Khabor, mentada nes tablilles de la ciudá de Mari, nel Éufrates mediu, y que na dómina grecorromana llevó'l nome de Phaliga)tendría vivíu dende aproximadamente 2269 e.C hasta aproximadamente 2030 e.C. El so nome significa "Dixebra", porque "nos sos díes dixebróse la tierra", esto ye, "la población de la tierra"; "d'ellí espardieralos Yahve sobre tola superficie de la tierra". (Xénesis 10:25; 11:9.). Un testu cuneiforme de Shar-kali-sharri, rei d'Akkad (y socesor de Sargón I d'Akkad), quien vivió nel tiempu de los patriarques, menta que restauró una torre-templu en Babilum (Babel, Babilonia), colo que da a entender que tal edificiu esistía enantes del so reináu. De fechu, nos rexistros sumerios apaez mentada comu Kadingira, que ye l'equivalente sumeriu del akkadio Babilum.